බ්‍රිගේඩියර් ප්‍රියංක ප්‍රනාන්දු යළි සේවයේ පිහිටුවයි


බ්‍රිතාන්‍ය  ශ්‍රී ලංකා මහ කොමසාරිස් කාර්යාලයේ අමාත්‍ය  ආරක්ෂක උපදේශක බ්‍රිගේඩියර් ප්‍රියංක ප්‍රනාන්දුගේ සේවය අත්හිටුවීමට ගත් තීරණය ජනාධිපති මෛත්‍රීපාල සිරිසේනගේ මැදිහත්වීමෙන් අවලංගු කර තිබේ.

ලන්ඩන් නුවර පැවති නිදහස් දින සැමරුම් උත්සවයකදී මෙම බ්‍රිගේඩියර්වරයාගේ හැසිරීම පිලිබඳව සමාජ මාධ්‍යවල පළවූ වීඩියෝ දර්ශන පිලිබඳව අවධානය යොමු කරමින් විදේශ අමාත්‍යංශය ඔහුගේ සේවය අත්හිටුවීමට පියවර ගෙන තිබිණි.

මේ පිලිබඳව ලන්ඩන් නුවර සිටින ශ්‍රී ලංකා මහ කොමසාරිස්වරිය වෙත අවශ්‍ය උපදෙස් ලබාදුන් බව විදේශ කටයුතු අමාත්‍යංශය ඊයේ (06) නිවේදනයක් නිකුත් කරමින් සදහන් කළේය.

මෙම සිද්ධිය පිලිබඳව යුධ හමුදාව විසින්ද නිදහසට කරුණු විමසා බ්‍රිගේඩියර් ප්‍රියංක ප්‍රනාන්දු වෙත ලිපියක් යොමු කර තිබේ.

මේ සම්බන්ධයෙන් අදහස් දැක්වූ යුධ හමුදාපති ලුතිනන් ජනරාල් මහේෂ් සේනානායක සඳහන් කළේ අදාළ සිද්ධිය පිලිබදව බ්‍රිතාන්යයයේ ශ්‍රී  ලංකා මහ කොමසාරිස් කාර්යාලය සිදුකරන ඕනෑම පරීක්ෂණයකට යුධ හමුදාවේ සහයෝගය ලබා දෙන බවයි.

එහෙත් පරීක්ෂණයකින් තොරව ඔහුගේ සේවය අත්හිටුවීම පිලිගත නොහැකි බව යුධ හමුදාපතිවරයා සඳහන් කළේය.

මේ සම්බන්ධයෙන් අදාල බ්‍රිගේඩියර්වරයාගේ කරුණු පැහැදිලි කිරීමෙන් අනතුරුව ඉදිරි ක්‍රියාමාර්ග ගන්නා බවද යුධ හමුදාපතිවරයා වැඩිදුරටත් සදහන් කළේය.

කෙසේවෙතත් මෙම සිද්ධිය පිලිබඳව විශේෂ අවධානයක් යොමුකර ඇති ජනාධිපති මෛත්‍රීපාල සිරිසේන අමාත්‍ය ආරක්ෂක උපදේශක බ්‍රිගේඩියර් ප්‍රියංක ප්‍රනාන්දුගේ සේවය අත්හිටුවමින් යොමු කර තිබූ ලිපිය වහාම ක්‍රියාත්මක වන පරිදි අවලංගු කර තිබේ.

එමෙන්ම ඔහු යලි  සේවයේ පිහිටුවන ලෙසද ජනාධිපති මෛත්‍රීපාල සිරිසේන උපදෙස් ලබා දී ඇති බව යුධ හමුදාපති ලුතිනන් ජනරාල් මහේෂ් සේනානායක සදහන් කළේය.
Share on Google Plus